حكايه إبن بلد..

لما سالوني عن ايام زمان..

قلتلهم هحكلكوا من يوم ما قالوا

أن اوان الحرب ان...

والعدو في كل مكان..

والبلد مش أمان..

وكنت لسه طفل صغير

واقف على أرضي

الى بإيدي زرعها

خضرة وورود...

ودعيت ربي يحفظها

من بطش اليهود..

وقلتلها هحميكي لو قربولك

وهكون من اشحع الجنود..

وهتشوفي اساطير

ولاد بلدي

من تاني بتعود..

وبصيت ساعتها جنبي

لقيت فوزية خايفة

قلتلها دا من ايه..؟؟

دا شوية صواريخ ودبابات

من الى رجلتنا تقدر عليه...

يا بنت الخال

ريحي البال

والله اعلم بالحال .. ولا ايه؟

طمنتها وريحت قلبها

وقلبي من خوفه

معدتش حاسس بيه...

مرت سنين وكبرنا

ومن يومها

فوزية شيفاني بطل عظيم...

إن جيت للحق

كانت زينة الحريم...

ملكة في قصرها

ملك لوحدها

حلوه في طبعها

قربها مني نعيم...

ودقلها قلبي

وقلت اجعلها نصيبي

قادر يا كريم...

وفوزية بقت عروسة

بس

مش انا العريس...

وامها جوزتها للى يسفرها

روما وباريس..

وكنت من بعدها

هروح فطيس...

والناس بقت عندي

يا مبين ندل

يا خسيس...

وقلت خلاص اشوف نفسي

بقى شوية

فشتغلت شغلانه

رزقي منها قليل...

وخلقي فيها ضيق

وبالى عليها مش طويل..

وقاطعه حيلي

وقلبي منها عليل..

بس ربنا قالي

اسعى يا عبدي

وكله هو بيه كفيل....

و علشان كده

دلوقتي رزقي رزق جبال..

وما فيش احسن من كده حال...

وبقى عندي عبد الجليل

و"فوزية"

وعبد العال..

وكل البركة

في ام العيال...

ويارتكوا تعرفوا

مين هي ام العيال!!!....

اسراري عندها

وبحبها وبتحبني..

وبقلبها

على كل خير تدلني...

ولما اخيب في حاجه

والشيطان يوزني...

تقولي استغفر ربنا

والى اتهد من تاني يتبني....

وكل ما انجز حاجه

اروح على التانية

وما تعبشي...

لأني مش ناوي

اكون في الدنيا

كاني ما جتشي....

واخد على قدي

وما ازدشي...

وما ينفعش اكون تخمان

وغيري ما شبعشي....

دنا ابن بلد اساسها...

خير واصل وطيبة ناسها..

و هيفضل الحب كاسها...

حتى وإن جار الزمان على الاية

وعكسها...

واحنا بنفتكر ايام زمان

وبنحكي ونقول...

جالنا طبق فول..

بالخلطة متوضب و معمول..

وقلتلهم قبل ما نغمس كده على طول...

سموا بالله

وصلوا على الرسول...

ــــــــــــــــــــــــــــــــــ ....